زینبه باخ

زینبه باخ

‌طالِعهَ باخ کوکبَه باخ

دولته باخ مٌوکبَه باخ

مَکتبه باخ مَذهَبه باخ

زینبه  باخ  زینبه باخ

زینب زهرا قیزیدی سید بَطحا قیزیدی

آدم و حوا قیزیدی هاجر و سارا قیزیدی

مریَم عَذرا قیزیدی عِصمت کُبری قیزیدی

یاسین و طاها قیزیدی اُمَ اَبیها قیزیدی

فخریده اٌمّ و اَبهَ باخ زینبه باخ زینبه باخ

زینب لایق یارانوب بَحر علایق یارانوب

قارداشا عاشق یارانوب عشقده صادق یارانوب

آدی علینون آدینا زِیب و یاراشیق یارانوب

دشمنه فایِق یارانوب شیعیه شایِق یارانوب

قلبی یارالیق یارانوب باشی قَرالیق یارانوب

شاِعره باخ مطَلَبه باخ زینبه باخ زینبه باخ

بیر قیزاولان فاطمه دن طاهره دوشدن سود امن

حَق بینوب خَلق ایلین اُمّ و اَب اللّٰه دین

قارداش حسینیله حَسَن جسمی ایدن شامی وطن

روحی اوچوب عَرشه گیدن کیمدی ویره دادسخن

آغریدیم آغزیم نیه من باخما منیم شعریمه سن

باخ ولی صَدمرتبه باخ زینبه باخ زینبه باخ

زینب عَجَب زینبیدی واقعی زینِ اَبیدی

چرخ غمه کوکبیدی دل دولی تاب وتبَیدی

فاطمه سِیر ایتدیگی یول زینبه خوش مَذهبَیدی

مَحضر پیغمبر اونون درس اوخیان مَکتبیَدی

صُحبته شیرین لَبیدی اٌلفتهَ خوش مَشرَبیدی

مَذهَبه باخ مَکتبه باخ زینبه باخ زینبه باخ

کَهفِ اَمان زینبیدی شیردَمان زینبیدی

رَزمه قاچان زینبیدی جِبهه آچان زینبیدی

آلجاق حسینون سَسینی داده چاتان زینبیدی

شمر جَفاسیله اَول قانه باتان زینبیدی

قانینی قارداش قانینا اوردا قاتان زینبیدی

دشمن لامذهَبه باخ زینبه باخ زینبه باخ

زینبه فکر ایتسون اگر غارته بیر ایله نظر

بیردن اوتوزمین توکولوب خیمه لره لشگرشَر

چاره‌سیز اطفال حسین گل کیمی وحَشتدن اَسر

بعضی قاچور قَمچی دَگر کیم دایانور سیلی یِیرَ

خیمه قباقینده خانم قوللارین ایتمشدی سِپرَ

معرکه اَصحبه باخ زینبه باخ زینبه باخ

هر کیمه کی قمچی وروب سویماقا اُول قوم دَغا

زینب او دَم قوللارینی ویردی سِپرَ تک قاباغا

بسکی خانم وردی ئوزون گاه سولا گاه ساغا

آهی ایله شُعله‌لَنور اود دوتور اُول ماه لقا

قَمچی دگنده ایله بیل کیمدی سو توکدی چراغا؟

جِسمیده تاب وتَبَه باخ زینبه باخ زینبه باخ

شُعله یاتوب کول اوجالوب خیمه سَرا اولدی تالان

یاندی یانان قاچدی قاچان سویدی سویان آلدی آلان

ناخوش اِمام اولدی فقط زینب مظلومه قالان

سیلی دگوب لاله‌لَنوب رنگ جمالی سارالان

گوز ویریم‌آندا خانیمون دَبدبه‌سی اولدی یالان

جنگیده رسم و دَبهَ باخ زینبه باخ زینبه باخ

زینبه عشقون آجیسی شَهدیدی هم شَکرَّیدی

دختر صِدّیقه نشان فاطمیه مَظهریدی

سِیّد مظلومه خانم مادریدی خواهریدی

قاتله عِجز ایلمدی گورنه وفا پروریدی

خنجره تنها سپری اَلده قرا معجریدی

گردش روز و شبه باخ زینبه باخ زینبه باخ

زینب اودور دشمن ئوزی مات قالوب همتینه

زینب اودور دالدالانوب عصمت اونون عِصمتینه

زینب اودور چادُر آتوب عِزّ وشَرف قامتنه

آند ایچوب اَوّلده خانیم مرتضوی غیرتنه

قویمادی بیر رخنه چاتا قارداشون حیثیَّتنه

همت زین‌اَبه باخ زینبه باخ زینبه باخ

مرحوم استاد رحیم منزوی