زبانحال حضرت رباب س

زبانحال حضرت رباب س

گون کی غروب ایدر دولانار آی گلر علی

آی جلوه سین ستاره لره گسترر علی

بیر آیری منظره گورونر عرش و فرشیده

اوغلی ئولن او منظره نی چوخ سوور علی

خیره لنوب ستاره لره اِیسترم باخام

گوررم آخار یوزون یوزومه دوندرر علی

گلم فغانه آه چَکوب آغلارام سنه

چشم فلک باخار من زاره گولر علی

اِیله کریخدیروبدی فلک اولمیان کیمی

اللر دئیر رباب بو غمدن ئولر علی

بو وسعتیله عالمی زندان اولوب منه

ای کاش ئولم غمونده من دیده تر علی

بو آرزونی صبح و مسّا  ایلرم اوزوم

ئولسم مزاریده اورکیم دینجلر علی

گونلر قباقی سنسیز اولوب مسکنیم منیم

دردیم ندور بالاسی اولنلر بولَر علی

الله بولور کی آیریلقندان نه چَکمیشم

چَکمیش باشیم مدینه ده گل گور نلَر علی

سَندن منه قماطیله بیر بوش بِشیک قالوب

گاهی آنان آچار اونی گاهی بَلر علی

گاهی سالوب بو بوش بِشیکه قانلی قونداقی

لای لای دیر آنان، بِشیکون تَرپَدَر علی

خوش گونلریم سَنیله کِچوب روزگاریده

دائم او گونلره آنان حَسرت چَکر علی

قالدوم غریبه گونلره سَنسیز مدینه ده

دونسه دونرگه ساخلاماق اولماز دونَر علی

گیتدون سو اوسته قانه بَلشدون قیتمدون

ایتدون منی جهاندا عجب در به در علی

سن باخ منه که نقشه چَکردیم گیجه گونوز

بولمزدیم  هیچ قضّا اَلون اَلدن اُزَر علی

نهر قوتولمازیدی سو ویرسِیدیلر سنه

دولمازدی داغلی قلبیمه غمدن شَرر علی

سَندن صورا آچیلدی فراتین یولی دیدیم

ای وای منه سو اِیچسم اگر سود گَلر علی

اِیچدیم نه اِیچدیم اِیله بیر اود دوشدی جانیمه

گوردوم که اودلی سینه ده بیر سود گَزر علی

گلدیم فغانه سَسلدیم ای سینه مین گولی

سَس ویر منی یریندَن اِیله با خبر علی

چوخ سَسلدیم ولی سَسیمه سَس یِتیرمَدون

ئولدوم دیریلدیم اولدی خلاصه سحر علی

آخر سَنی او چولده اَیتیردیم  تاپانمادوم

آختاردی تاپدی مدفنیوی نیزه لَر علی

گوردوم او ظالمی که تاپوپ قانلی قونداقون

فخر اِیلیور بو فعله او کوته نظر علی

القصّه، نی ده اولدی نمایان او گول یوزون

اولدوخ دوباره شامه کیمین همسفرعلی

شامین یولوندا شامه کیمین اوخشاما ددیم

قان آغلادوم غمونده من خونجگر علی

سَسلردیم ای آناسینی گوزدن آتوب گِیدن

گل سینه مه یرون بالا بوش گورسَنر علی

چارم کسیلدی اللریوی باغلادوم سنون

سو اوسته گور بالا آناسندان کوسَر علی

قربان اولا او پاچالانان لبلره آنان

قربانی ذبح اِیدن اونا بیر سو ویرَر علی

ای کاش آنان اُلیدی او احوالیله سنه

نوک جداده اِیلمییدی نظر علی

ای سینمه جهاندا سالان آیریلق اوتون

دَردون منی مزاریمه تِز گوندَرَر علی

آغلار گوزیله نظمه چکوب غم سوزون

سَندن برات کرب و بلا ایستیر علی

[کربلایی زین العابدین]